قافيتي

تغني فيني قافيتي وتاقف بي على حسرة
أشوف الموت ناصيني وكل بابٍ عليه قفول
زمانٍ كانت البسمة لها صوت ولها نبرة
وماكنت أحتسب للهم ولالي في عشيقٍ قول
طبيعي عايش بطبعي ولالي بالهوى خبرة
وتتقلب بي الأحوال وأدخل عالمٍ مجهول
واصير العاشق الولهان بكل اليوم والسهرة
حبيبي مادرى عني وتاركني كذا على طول
يقول اليوم ما أقدر ويمكن أقتدر بكرة
ويسحب لي على(يمكن)بأحداثٍ تجي وفصول
أنا مليت ياعالم وحلقاتي غدت تكره
سنين العشق وايامه وحتى حرفه المعسول
أشيل الهم ولوحدي وماأحذف ولافقرة
أبي أحدٍ يواسيني ولو ماشال عني حمول
غدا قلبي لاجل عشقه أسير ٍ عاشق ٍ أسره
ولو فكوه بالوادي رجع لم الأسر مخذول
وقيد نفسه بنفسه واستجمع قوى صبره
على إن الصبر خلص وباقي قولة المأمول
رصيدٍ كاذبٍ عبى به الخاطر على فقره
وصدق قلبي الكذبه وكذب صادق المعقول

الأمل

كأن الأمل مرسى ماله مرساة
محدن يقرب له ولااحدن يجيله
ماله سوى معنى يزيدنا مأساة
نبحر نبي دربه ونضيـَّع سبيله
آمالنا تحيا بقلوبنا بسكات
والا على الواقع ماتت عليلة
لأنها أصلا أوهام آهات
نتعب ندورها باليوم والليلة
ولانحصل شي وتضيع أوقات
وكلنا ضعنا مدلول ودليله

متفرقات

هي الرقابة اليوم تحتاج مرقاب
كلن يبي يجني خطاه وصوابه
إذا العنا صابك كلن له حساب
اللي تسبب لك دق العنا بابه
****
كيف القلم يكتب مشاعري بسكات
يمشي على الأوراق والحرف ماهزه
****
لاتطلب الأحلام تراها تجلـَّى
ومن نساك اليوم أنسى علومه
لاتلتفت ورى وتطيح وتخلــَّى
وتذوق مر الحب في غير يومه
كلن يعيش بهم بس يتسلى
والقلب يسلى لو يرمي همومه
****
ليه الصفا ينتهي كله بلحظة
ننسى الغلا والود ونصير أشرار
ليه الخطا يمحي مشاعرٍ مكتظة
هو حبنا صادق أو فيه أسرار
****
وين المحبة اليوم وين الغلا فيها
كلن تبناها ونشوفها عريانة
****
من قبل كنت أحبك وبجنون
لكن اليوم مالك بقلبي غلا
أنت أحرقت المشاعر والشجون
أنت دمرت الحب قدام الملا
أنت مين ولامين وش تكون
يللا علمني ياساس البلا
خلك بصمتك تقراك العيون
مستحيل تشوف من قلبي هلا
****

بعض الناس

جنيت الهم وش غيره أبجني
من وجيهٍ حياها دوم غايب
تبي هذرٍ يقول الحكي خذني
تبي فعلٍ يجيك الفعل خايب
ولو قلت نتواجه صار حصني
وركـَّبك الخطا بلوم وطلايب
ولا يغرك شباب وثوب مثني
ترى تحت الثياب علوم شايب
وكل من قابله بالوهم يبني
جسور ٍ للمعارف والحبايب
وبعدين بيشوف القرب يعني
زيادة في البلاوي والمصايب
جعل شكله يغيب اليوم يفني
جعل من لامني يشوف العجايب

الرجال في زماننا

ليه الرجال اليوم تمشي على خيبة
راحت مخابرها وعلوم منسية
يمشي ورى الحرمة وبزعمهم طيبة
الطيب شرق إلا قل ضعف شخصية