قافيتي

تغني فيني قافيتي وتاقف بي على حسرة
أشوف الموت ناصيني وكل بابٍ عليه قفول
زمانٍ كانت البسمة لها صوت ولها نبرة
وماكنت أحتسب للهم ولالي في عشيقٍ قول
طبيعي عايش بطبعي ولالي بالهوى خبرة
وتتقلب بي الأحوال وأدخل عالمٍ مجهول
واصير العاشق الولهان بكل اليوم والسهرة
حبيبي مادرى عني وتاركني كذا على طول
يقول اليوم ما أقدر ويمكن أقتدر بكرة
ويسحب لي على(يمكن)بأحداثٍ تجي وفصول
أنا مليت ياعالم وحلقاتي غدت تكره
سنين العشق وايامه وحتى حرفه المعسول
أشيل الهم ولوحدي وماأحذف ولافقرة
أبي أحدٍ يواسيني ولو ماشال عني حمول
غدا قلبي لاجل عشقه أسير ٍ عاشق ٍ أسره
ولو فكوه بالوادي رجع لم الأسر مخذول
وقيد نفسه بنفسه واستجمع قوى صبره
على إن الصبر خلص وباقي قولة المأمول
رصيدٍ كاذبٍ عبى به الخاطر على فقره
وصدق قلبي الكذبه وكذب صادق المعقول